សៀមរាប ថ្ងៃទីថ្ងៃទី ២១ ដល់ ២៥ ខែកក្កដា ឆ្នាំ២០១៤ កន្លងមក៖ ក្រោមកិច្ចសហការណ៍រៀបចំដោយ IAEA និងលគជបភ បានបើកវគ្គសិក្ខាសាលាអប់រំគ្រូបង្គោលក្នុងតំបន់អាស៊ីអាគ្នេយ៍ស្តីអំពី ” បច្ចេកទេសរាវរកសារធាតុវិទ្យុសកម្ម ” ដោយមានការចូលរួមពីសិក្ខាកាមចំនួន ៣៥នាក់ ដែលអញ្ជើញមកពីប្រទេសចំនួន៩ ក្នុងតំបន់អាស៊ីអាគ្នេយ៍ដូចជា (ប្រទេសប្រុយណេ, កម្ពុជា, វៀតណាម, ឡាវ, ថៃ, ភូមា, ម៉ាឡេស៊ី, ឥណ្ឌូណេស៊ី និងហ្វីលីពីន) សហការពីអាមេរិក និងIAEA។
ក្រោយពីបានបញ្ចប់វគ្គសិក្ខាសាលារួចមកសិក្ខាកាមទាំងអស់មានសេចក្តីសប្បាយរីករាយ ដោយមានតំណាងប្រទេសចំនួន ៩ បានឡើងធ្វើសេចក្តីថ្លែងអំណរគុណចំពោះ IAEA និងលគជបភ ដែលបានបង្កើតនូវវគ្គសិក្ខាសាលានេះឡើង ប្រកបទៅដោយភាពជោគជ័យ។ សិក្ខាកាមម្នាក់ៗបានបញ្ជាក់ថាសិក្ខាសាលាមួយនេះបានផ្តល់ចំណេះដឹង និងការចែករំលែកបទពិសោធន៍ឲ្យគ្នាទៅវិញទៅមករវាងសមាជិកប្រទេសដែលចូលរួម បានហ្វឹកហ្វឺនបន្ថែមដល់គ្រូបង្គោលក្នុងការប្រើប្រាស់ឧបករណ៍រាវរកសារធាតុវិទ្យុសកម្ម និងការចុះអនុវត្តផ្ទាល់នៅអាកាសយាន្តដ្ឋានអន្តរជាតិសៀមរាបទៀតផង ហើយគេទាំងអស់គ្នានឹងយកនូវបទពិសោធន៍ទាំងនេះទៅបង្ហាត់បង្រៀនដល់សមាជិកក្រុម និងមន្ត្រីជំនាញរបស់ខ្លួនតាមប្រទេសនីមួយៗ។
ចុងបញ្ចប់ តំណាង លគជបភ បានឡើងធ្វើសេចក្តីថ្លែងអំណរគុណចំពោះប្រទេសទាំង៩ ដែលបានបញ្ជូនសិក្ខាកាមចំនួន ៣៥ នាក់មកចូលរួមក្នុងវគ្គសិក្ខាសាលាអប់រំគ្រូបង្គោលក្នុងតំបន់អាស៊ីអាគ្នេយ៍ស្តីអំពី ” បច្ចេកទេសរាវរកសារធាតុវិទ្យុសកម្ម ” នេះ ហើយបានខិតខំសិក្សារហូតទទួលបានជោគជ័យ និងក៏សូមថ្លែងអំណរគុណចំពោះ សហរដ្ឋអាមេរិក EU និង IAEA ដែលបានសហការក្នុងការបើកសិក្ខាសាលានេះឡើងរហូតទទួលបានជោគជ័យ ក៏សូមថ្លែងអំណរអរគុណចំពោះលោកគ្រូអ្នកគ្រូដែលបានខិតខំយកចិត្តទុកដាក់បង្ហាត់បង្រៀនដល់សិក្ខាកាមរហូតទទួលបានជោគជ័យ។
