ភ្នំពេញ៖ ដោយមើលឃើញពីសេចក្តីត្រូវការ និងសារៈសំខាន់ដ៏ចាំបាច់បំផុត ក្នុងការផ្តល់ចំណេះដឹងដល់មន្រ្តី បុគ្គលិករបស់ខ្លួនទាំងអស់ លេខាធិការដ្ឋានគណៈកម្មាធិការជាតិប្រឆាំងភេរវកម្ម បានរៀបចំវគ្គបណ្តុះបណ្តាលមួយ ស្តីពីសៀវភៅផែនការជាតិប្រឆាំងភេរវកម្ម ដោយបានដំណើរសិក្សាចាប់ពីថ្ងៃទី ១៨ ខែ សីហា ឆ្នាំ២០១៤ កន្លងមក បានឈានដល់ការបិទបញ្ចប់វគ្គបណ្តុះបណ្តាលជាស្ថាពរហើយ នៅព្រឹកថ្ងៃទី ១០ ខែ តុលា ឆ្នាំ ២០១៤ ដោយមានការបង្ហាត់បង្ហាញផ្ទាល់ពី ឯកឧត្តម ឧត្តមសេនីយ៍ឯក គឹម នាន និងមានការអញ្ជើញចូលរួមពីលោកប្រធាន/អនុប្រធាននាយកដ្ឋាន, លោកប្រធាន/អនុប្រធានការិយាល័យ និងមន្រ្តី បុគ្គលិក នៃលេខាធិការដ្ឋានគណៈកម្មាធិការជាតិប្រឆាំងភេរវកម្ម ជាសិក្ខាកាមជាច្រើននាក់ផងដែរ។
បន្ទាប់ពីទទួលបានការសិក្សាលើទ្រឹស្តី និងស្តាប់ការលើជាឧទាហរណ៍មួយចំនួន ក្នុងការសិក្សាពីសៀវភៅផែនការជាតិប្រឆាំងភេរវកម្មជាតិ រួចមកហើយនោះ ទើបនៅសប្តាហ៍ចុងក្រោយនៃវគ្គបណ្តុះបណ្តាល លោកគ្រូបង្គោល បានរៀបចំសេនារីយ៉ូសំខាន់ៗចំនួន០៣ ដើម្បីឲ្យសិក្ខាកាមទាំងអស់រៀបចំធ្វើបទបង្ហាញ ស្វែងយល់ និងរកដំណោះស្រាយលើបញ្ហាដែលកើតមានតាមសេនារីយ៉ូនីមួយៗ ដោយមានការណែនាំ និងផ្តល់យោបល់កែតម្រូវបន្ថែមពីលោកគ្រូបណ្តុះបណ្តាលផងដែរ ។ សេនារីយ៉ូទាំង០៣ គឺ ៖
សេនារីយ៉ូទី១ អគ្គីភ័យបានឆាបឆេះ ០៣ កន្លែង នៅក្នុងព្រលានយន្តហោះអន្តរជាតិភ្នំពេញ (ក្នុងកន្លែងរង់ចាំ, កន្លែងទទួលភ្ញៀវ និងឃ្លាំងផ្ទុកទំនិញ) ក្នុងកំរិតមួយខ្លាំងក្លានៅម៉ោង១០:២៥ នាទីព្រឹកថ្ងៃទី២៥ ខែ កញ្ញា ឆ្នាំ ២០១៤ ។ របាយការណ៍ពីអគ្គីភ័យត្រូវបានរៀបចំឡើងដោយផ្ទាល់មាត់របស់មន្រ្តីអន្តោប្រវេសន៍ប្រចាំការក្នុងព្រលានយន្តហោះ ហើយថានៅទីលានចំណតរថយន្ត មានរថយន្ត០១គ្រឿង មានផ្ទុកជាតិផ្ទុះផង ។
សេនារីយ៉ូទី២ នៅម៉ោង ០១:៣០ នាទីថ្ងៃទី២៥ ខែ កញ្ញា ឆ្នាំ ២០១៤ នាវាទេសចរណ៍ IL.De.France បានចូលចតនៅកំពង់ផែក្រុងព្រះសីហនុ។ តាមព័ត៌មានបញ្ជូនមកដោយនាយកកំពង់ផែថា នៅម៉ោង ០២:៣០ នាទីមានករណីចាប់ជំរិតភ្ញៀវទេសចរណ៍ទាំងអស់លើនាវានេះ ហើយមិនទាន់មានព័ត៌មានជាក់លាក់ថាមានភ្ញៀវពិតប្រាកដចំនួនប៉ុន្មាននោះទេ។ តាមមន្រ្តីប៉ូលីសប្រចាំច្រកទ្វារកំពង់ផែបានទទួលបញ្ជីឈ្មោះចំនួន ៥២០នាក់ ដោយមិនគិតពីនាវិក, អ្នកបំរើ និងកម្មករលើនាវានោះឡើយ ។
សេនារីយ៉ូទី៣ នគរបាលខេត្តសៀមរាប បានបង្ហាញពីខិតប័ណ្ណជាច្រើនសន្លឹកនៅថ្ងៃទី ២៦ ខែ កញ្ញា ឆ្នាំ ២០១៤ ដែលជនអនាមិកបាចក្នុងខេត្ត ដែលក្នុងខ្លឹមសារគំរាមថា នឹងធ្វើការវាយប្រហារ និងចាប់ជំរិតអ្នកទេសចរណ៍បច្ចឹមប្រទេសដោយកាត់ក ប្រសិនបើរដ្ឋាភិបាលកម្ពុជាមិនដកខ្លួនចេញពីការគាំទ្រ និងប្រឆាំងពួករដ្ឋឥស្លាម (ISIS) ទេនោះ ។
ឆ្លងតាមរយៈនៃការសិក្សាសៀវភៅផែនការជាតិ និងការធ្វើបទបង្ហាញកន្លងមកនេះ ឯកឧត្តម ឧត្តមសេនីយ៍ឯក គឹម នាន បានធ្វើការវាយតំលៃខ្ពស់ពីលទ្ឋផលនៃវគ្គបណ្តុះបណ្តាលនេះ ដោយសិក្ខាកាមទាំងអស់មានការយកចិត្តទុកដាក់ និងខិតខំប្រឹងប្រែងក្នុងការសិក្សាចាប់តាំងពីថ្ងៃបើកវគ្គដំបូង រហូតដល់ថ្ងៃបិទវគ្គ ដែលអាចយកចំណេះដឹងទាំងនេះទៅបំរើដល់ការងារ និងតួនាទីភារកិច្ចរបស់ខ្លួន ក៏ដូចជាអង្គភាពទាំងមូលអោយកាន់តែមានប្រសិទ្ឋភាពខ្ពស់ផងដែរ ៕ (ហៀង សុជាតិ)
