ភ្នំពេញ ៖ នារសៀលថ្ងៃទី ០២ ខែ មីនា ឆ្នាំ ២០១៥ នៅលេខាធិការដ្ឋានគណៈកម្មាធិការជាតិប្រឆាំងភេរវកម្ម (ទីតាំងអគ្គស្នងការនគរបាលជាតិ) ឯកឧត្តម អ៊ុឹង អៀង សមាជិក ល.គ.ជ.ប.ភ តំណាងដ៏ខ្ពង់ខ្ពស់ ឯកឧត្តមទេសរដ្ឋមន្រ្តី ឱម យ៉ិនទៀង អនុប្រធាន ល.គ.ជ.ប.ភ បានទទួលជួបពិភាក្សាការងារជាមួយគណៈប្រតិភូជប៉ុន (JICA) និងគណៈប្រតិភូអាស៊ាន ក្នុងគោលបំណងស្វែងយល់ពីការចងក្រងសៀវភៅផែនការជាតិប្រឆាំងភេរវកម្ម ហើយក៍មានការអមអញ្ជើញចូលរួមពីប្រធាននាយកដ្ឋានទាំង៤ ចំណុះលេខាធិការដ្ឋានផងដែរ ។
នៅក្នុងជំនួបនេះ ឯកឧត្តម អ៊ុឹង អៀង បានមានប្រសាសន៍ស្វាគមន៍ និងថ្លែងអំណរគុណចំពោះគណៈប្រតិភូទាំងអស់ដែលបានចាប់អារម្មណ៍ និងចំណាយពេលវេលាដ៏មមាញឹក ក្នុងការចុះមកស្វែងយល់ពីសៀវភៅផែនការជាតិប្រឆាំងភេរវកម្ម ដែលបានចងក្រងឡើងដោយលេខាធិការដ្ឋាន គ.ជ.ប.ភ ដែលការចងក្រងសៀវភៅផែនការជាតិនេះ គឺផ្តោតទៅលើចំណុចសំខាន់ៗចំនួន០៤ រួមមាន ទី១៖ ការការពារ, ទី២៖ ការទប់ស្កាត់, ទី៣៖ ការឆ្លើយតប និងទី៤៖ ការស្តារឡើងវិញ ។ មួយវិញទៀតការចងក្រងសៀវភៅផែនការជាតិនេះ គឺដើម្បីបែងចែកភារកិច្ចរបស់កងកម្លាំងមានសមត្ថកិច្ចរបស់កម្ពុជា សំដៅធ្វើយ៉ាងណាមិនឲ្យជាន់ដែនសមត្ថកិច្ចគ្នា ដោយបានចែងយ៉ាងច្បាស់ពីតួនាទី និងភារកិច្ច ដូចជា តើស្ថាប័នប៉ូលីស មានភារកិច្ចត្រូវធ្វើអ្វី? កងរាជអាវុធហត្ថ ត្រូវធ្វើអី្វ? និងកងយោធពលខេមរភូមិន្ទ ត្រូវធ្វើអី្វ? ហើយប្រសិនបើមានឧបទ្ទវហេតុភេរវកម្មកើតមានឡើង តើស្ថាប័នសំខាន់ណាខ្លះដែលត្រូវចូលរួម? ។ ឯកឧត្តម បានបន្តថា នាពេលកន្លងមក លេខាធិការដ្ឋាន គ.ជ.ប.ភ បានរៀបចំលំហាត់សមយុទ្ធសាកល្បង ទាំងទ្រង់ទ្រាយតូច និងទ្រង់ទ្រាយធំ ជាច្រើនលើករួចមកហើយ ដូចជានៅកំពង់ផែស្វ័យយ័តក្រុងព្រះសីហនុ ជាដើម ។ កម្ពុជា បានធ្វើលំហាត់សមយុទ្ធទ្រង់ទ្រាយធំ ហើយក៏មានការចូលរួមពីប្រទេសដៃគូរមួយចំនួនផងដែរ ដោយផ្អែកលើសៀវភៅផែនការជាតិនេះ អាជ្ញាធរគ្រប់លំដាប់ថ្នាក់របស់កម្ពុជា គឺបានអនុវត្តយ៉ាងល្អប្រសើរ និងទទួលបានជោគជ័យគួរជាទីមោទនៈ មិនតែប៉ុណ្ណោះគឺទទួលបានការកោតសរសើរពីស្ថាប័នអន្តរជាតិទៀតផង ។ ឯកឧត្តម អ៊ុឹង អៀង បានគូសបញ្ជាក់បន្ថែមថា ទោះបីជាពេលនេះ កម្ពុជា មិនទាន់ជាគោលដៅនៃការវាយប្រហារភេរវកម្មក៏ដោយ ប៉ុន្តែក្រោមការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា គឺកម្ពុជាប្តេជ្ញាជានិច្ចក្នុងការចូលរួម ទប់ស្កាត់ អំពើភេរវកម្មគ្រប់រូបភាព ទាំងថ្នាក់ជាតិ ថ្នាក់តំបន់ និងពិភពលោកទាំងមូល ។
ចំណែកភាគីជប៉ុន ក៏បានសំដែងការសាទរចំពោះកម្ពុជា ដែលបានរៀបចំចងក្រងសៀវភៅផែនការជាតិប្រឆាំងភេរវកម្មនេះ បានដោយជោគជ័យ ដែលសៀវភៅនេះពិតជាបានដើរតួនាទីយ៉ាងសំខាន់ សំរាប់ចង្អុលបង្ហាញផ្លូវដល់កងកម្លាំងរបស់កម្ពុជា ក្នុងការប្រឆាំងនិងអំពើភេរវកម្ម ហើយគណៈប្រតិភូក៏បានថ្លែងអំណរគុណយ៉ាងជ្រាលជ្រៅចំពោះ ឯកឧត្តមទេសរដ្ឋមន្រ្តី ឱម យ៉ិនទៀង ដែលបានប្រគល់ជូននូវសៀវភៅផែនការជាតិប្រឆាំងភេរវកម្ម ដល់គណៈប្រតិភូខ្លួននាពេលនេះ ។
នៅចុងបញ្ចប់នៃជំនួបនេះ ក្នុងនាម ឯកឧត្តមទេសរដ្ឋមន្រ្តី ឱម យ៉ិនទៀង អនុប្រធាន ល.គ.ជ.ប.ភ ឯកឧត្តម អ៊ុឹង អៀង បានថ្លែងអំណរគុណចំពោះគណៈប្រតិភូទាំងអស់ ហើយឯកឧត្តម សង្ឃឹមថាប្រទេសជប៉ុន និងចូលរួមជួយគាំទ្រ និងបណ្តុះបណ្តាលទាំងផ្នែកសំភារៈ និងផ្នែកបច្ចេកទេសដល់កម្ពុជាផងដែរ ។
ជំនួបនេះបានបញ្ចប់នៅវេលាម៉ោង ១៥:៣០ នាទី ថ្ងៃដដែល ប្រកបដោយបរិយាកាសសិ្នទស្នាល និងជោគជ័យគួរជាទីមោទនៈ ៕
