លេខាធិកាដ្ឋាន គណ:កម្មការជាតិ ប្រឆាំងភេរវកម្ម (គជបភ) បានបើកវគ្គហ្វឹកហ្វឺន គ្រូបង្គោល សម្រាប់មន្ត្រីជួរមុខ ស្ដីពីការប្រើប្រាស់ឧបករណ៍ រាវរកសារធាតុវិទ្យុសកម្ម នៅក្រុងសៀមរាប ក្នុងរយ:ពេល ៥ថ្ងៃ គឺពីថ្ងៃទី ៧-១១ ខែតុលា ឆ្នាំ២០១៣ ដែលជាជំហានថ្មី មួយទៀត ដល់មន្ត្រីសន្ដិសុខ របស់លេខាធិការដ្ឋាន គជបភ ទទួលបានពី IAEA ។ និងជាការរំលែកបទពិសោធន៍គ្នា ទៅវិញទៅមក ពិសេសគឺការពង្រឹង កិច្ចសហប្រតិបត្តិការ រវាងគ្នានឹងគ្នាដើម្បីរួមចំណែកក្នុងវិស័យ សន្ដិសុខនិងប្រសិទ្ធិភាពការងាររបស់ជាតិ និងអន្តរជាតិ។
វគ្គហ្វឹកហ្វឺននេះ ស្ថិតក្រោមអធិបតីរបស់លោក ទេសរដ្ឋមន្ត្រី ឱម យ៉ិនទៀង អនុប្រធានលេខាធិកាដ្ឋាន គណ:កម្មការជាតិប្រឆាំងភេរវកម្ម និងជា ប្រធានអង្គភាពប្រឆាំងអំពើពុករលួយ និងលោកស្រី ណ័រ ហ្វីតទ្រីយ៉ាហ៍ បាក់គ្រី (NOOR FITRIAH BAKRI) មន្ត្រី នៃការិយាល័យ សន្ដិសុខនុយក្លេអែរ របស់ទីភ្នាក់ ងារថាមពលអាតូមិកអន្តរជាតិ និងមាន គ្រូឧទ្ទេស គឺ លោក ហារី សូមីត្រូ លោក អេត អាដុល តំណាងពី ទីភ្នាក់ងារ ថាមពលនុយក្លេអែរឥណ្ឌូនេស៊ី និងអគ្គនាយកដ្ឋានគយ នៃប្រទេសលីបង់ សិក្ខាកាមចូលរួមមាន ពី អស់លោកដែលជាតំណាងពីអគ្គនាយកដ្ឋានគយ និងរដ្ឋាករកម្ពុជា មន្ត្រីសន្ដិសុខ មកពីកំពុងផែស្វយ័ត ក្រុងភ្នំពេញ-ព្រលានយន្ដហោះអន្តរជាតិភ្នំពេញ-ព្រលានយន្ដហោះអន្តរជាតិសៀមរាប និងមន្ត្រីលេខាធិការដ្ឋាន គជបភ ជិត ៤០រូប ។
លោកទេសរដ្ឋមន្ត្រី ឱម យ៉ិនទៀង បានមានប្រសាសន៍ ក្នុងពិធីបើក វគ្គហ្វឹកហ្វឺន ថា ក្នុងរយ:ពេលកន្លង មករាជរដ្ឋាភិបាលកម្ពុជា ក៏ដូចជាគណ:កម្មការជាតិប្រឆាំងភេរវកម្មដែលមានសម្ដេចតេជោ ហ៊ុន សែន ជាប្រធាន បានបង្ហាញពីជំហរ របស់ខ្លួនយ៉ាងមុតមាំក្នុងការ ចូលរួមជាមួយអន្តរជាតិក្នុងការទប់ស្កាត់ ប្រយុទ្ធប្រឆាំង នឹងការរត់ពន្ធដោយខុសច្បាប់នូវសារធាតុវិទ្យុសកម្ម និងនុយក្លេអែរនេះ ។
ជាក់ស្ដែងនៅឆ្នាំ១៩៩៣ កម្ពុជា បានចុះហត្ថលេខាលើអនុសញ្ញាហាមឃាតអាវុធគីមី និងបានផ្ដល់សច្ចាប័ន លើអនុសញ្ញាអន្តរជាតិ ជាច្រើនរួមមាន អនុសញ្ញាប្រឆាំងបរមាណូ អនុសញ្ញាប្រឆាំងអំពើរភេរវកម្ម អនុសញ្ញាជីវសាស្ត្រជាដើម ។ ជាងនេះទៅទៀត ប្រទេសកម្ពុជា បានចូលជាសមាជិក នៃអនុសញ្ញា មួយចំនួនទៀត ដូចជា អនុសញ្ញាស្ដីពីការការពារសេរីរាង្គ ពីសារធាតុ នុយក្លេអែរ-អនុសញ្ញា ស្ដីពីការកំណត់ សម្គាល់នៃគ្រឿងបន្លាស់ប្លាស្ទិកជាកម្មវត្ថុនៃការស្រាវជ្រាវ អនុសញ្ញាស្ដីពីការបង្ក្រាបការដាក់គ្រាប់ បែកច្នៃដោយ ភេរវកម្មជាដើម ។
ក្រៅពីការចូលរួមក្នុងច្បាប់ទាំងនេះ កម្ពុជានៅបានបង្កតើក្រុមការងារជាតិសម្រាប់អាវុធគីមី ជីវសាស្ត្រ វិទ្យុសកម្ម និងនុយក្លេអែរ រួមទាំងក្រុមការងារ បំពាក់ឧបករណ៍រាវរកសារធាតុវិទ្យុសកម្ម ក្រោមគម្រោងសន្តិសុខកំពុងផែ (Megaport Initiative) របស់ក្រសួងថាមពលអាមេរិក និងគម្រោងរួមគ្នា រវាង JRC ក្រសួងថាមពល និងក្រសួង ការពារជាតិសហរដ្ឋអាមេរិក ផងដែរ ។
ហើយជាលទ្ធផលនៃការសហការគ្នារវាងស្ថាប័នដែលពាក់ព័ន្ធ រួមមានអគ្គនាយកដ្ឋានគយ និងរដ្ឋាករកម្ពុជា អាជ្ញាធរកំពង់ផែ និងលេខាធិការដ្ឋាន គជបភ ដែលបាននាំមកនូវការបំពាក់ ការប្រើប្រាស់ការ ចែករំលែកព័ត៌មាន រវាងគ្នាបានដោយរលូន ។
លោកទេសរដ្ឋមន្ត្រី បានស្នើរដល់ IAEA មេត្តាពិនិត្យលទ្ធភាពបង្កើនសមត្ថភាពដល់មន្ត្រី របស់លេខាធិការ ដ្ឋានគជបភលើការឆ្លើយតបបឋមទៅនឹងឧបទ្ទវហេតុនៃសារធាតុទាំងនេះ ។ និងសូមលើកទឹកចិត្តដល់ IAEA ក្រៅពីការជួយជំរុញការហ្វឹកហ្វឺននេះ ក៏សូមពិនិត្យដល់ការបញ្វ្រាបការយល់ ដឹងពិគ្រោះថ្នាក់នេះ ដល់មូលដ្ឋានផងដែរ។ ការចុះអប់រំពីផលប៉ះពាល់ និងផលវិបាកពីសារធាតុទាំងនេះ ក៏ជាអត្ថិភាពនៃការបង្ការ និងការពារសន្ដិសុខវិទ្យុសកម្ម និងនុយក្លេអែរ ផងដែរ ៕
Comments are closed.