លេខាធិការដ្ឋាន គជបភ ចូលរួមប្រជុំជាមួយក្រុម CBRN Team របស់កម្ពុជាធ្វើសិក្ខាសាលារួម ជាមួយតំណាង CBRN Centres of Excellence របស់សហគមន៍អឺរ៉ុបលើគំរោងលេខ ២២ (ការសិក្សាស្វែងយល់ដើម្បីផ្តល់វគ្គបណ្តុះបណ្តាលដល់មន្រ្តីឆ្លើយតបបឋមលើឧបទ្ទវហេតុ CBRN) នៅកម្ពុជា ។

0

សណ្ឋាគារភ្នំពេញ៖ កាលពីថ្ងៃទី ៤-៥ ខែវិច្ឆិកា ឆ្នាំ២០១៣ ឯកឧត្តម អ៊ឹង អៀង តំណាងលេខាធិការដ្ឋាន​ គជបភ និងជាតំណាងឯកឧត្តម ទេសរដ្ឋមន្រ្តី ឳម យ៉ិនទៀង បានចូលរួមប្រជុំក្នុងក្រុមការងារ CBRN Team របស់កម្ពុជា (គំរោងលេខ២២) រួមជាមួយតំណាង CBRN Centres of Excellence របស់សហគមន៍អឺរ៉ុប​ ដែលដឹកនាំដោយលោក Nigel Tottie (UK) អ្នកស្រី Jenine Foxhall (UK) និងលោក Dominique Bonjour (France)។

កិច្ចប្រជុំនៃអង្គសិក្ខាសាលានេះរួមមានមន្ត្រីមកពីអង្គភាពពាក់ព័ន្ធនានារបស់កម្ពុជាដូចជា៖ ក្រសួងការពារជាតិ លេខាធិការដ្ឋាន គជបភ ក្រសួងឧស្សាហកម្ម រ៉ែ និងថាមពល ក្រសួងកសិកម្ម រុក្ខាប្រម៉ាញ់ និងនេសាទ ក្រសួងមហាផ្ទៃ (អង្គភាពពន្លត់អគ្គិភ័យ) ក្រសួងសុខាភិបាល អាជ្ញាធរជាតិ​អាវុធគីមី នុយក្លេអ៊ែ វិទ្យុសកម្ម និងជីវសាស្រ្តរបស់ក្រសួងការពារជាតិ និងតំណាងរបស់ក្រុមការងារ CBRN Team ផងដែរ។

បន្ទាប់ពីកិច្ចពិភាក្សាស្វែងយល់គ្នាអស់រយៈពេល២ថ្ងៃ​រួចមក អង្គសិក្ខាសាលាសម្រេចនឹង​ផ្តល់-ទទួលវគ្គហ្វឹកហ្វឺនជំនាញ CBRN 1st Responder Team មួយចំនួនដល់មន្ត្រីលេខាធិការ ដ្ឋាន គជបភ និងអង្គភាពពាក់ព័ន្ធ ដែលគ្រោងនឹងចាប់ផ្តើម នាខែមីនា ឆ្នាំ២០១៤ ខាងមុខនេះ នៅលេខាធិការដ្ឋាន គជបភ ។

ប្រទេសកម្ពុជាជាប្រទេសឈានមុខគេក្នុងការសហការជាមួយសហគមន៍អឺរ៉ុបលើការងារ CBRN នេះក្នុងតំបន់​ ហើយកម្ពុជាក៏ជាប្រទេសមួយក្នុងចំណោមប្រទេសចំនួន៤ នៅតំបន់អាស៊ីអាគ្នេយ៍​​(ប្រទេសហ្វីលីពីន, កម្ពុជា, ឡាវ និងម៉ាឡេស៊ី) ដែលទទួលជំនួយហ្វឹកហ្វឺន និងការកសាងស្ថេរភាព នេះផងដែរ ក្រៅពីនេះមានប្រទេសនៅតំបន់អាហ្រ្វិកចំនួន ៣ទៀត គឺប្រទេស ម៉ូរ៉ូកូ ប្រទេសហ្គាមុង និងប្រទេសសេណេហ្គាល់។

ប្រទេសកម្ពុជាទទួលបានគំរោងចំនួន ១៩ ពីសហគមន៍អឺរ៉ុប លើការងារពាក់ពន្ធ័នឹងកិច្ចខិតខំប្រឹងប្រែងរួមក្នុងការបង្កើនសមត្ថភាពផ្លូវច្បាប់ ធនធានមនុស្ស និងឧបករណ៍សំរាប់ការបង្ការ ការទប់ស្កាត់ ប្រយុទ្ធប្រឆាំង នឹងការរត់ពន្ធនូវសារធាតុ CBRN ដោយខុសច្បាប់ ជាសកល។

photo2 photo1