ភ្នំពេញ ៖ នៅព្រឹកថ្ងៃទី២០ ខែសីហា ឆ្នាំ២០១៥ វេលាម៉ោង១០:០០នាទី នាយកដ្ឋានការពារហេដ្ឋារចនាសម្ព័ន្ធ ដឹកនាំដោយ ឯកឧត្តម ស សេរីវិចិត្រ ប្រធាននាយកដ្ឋាន, លោក ពៅ វិទូ អនុប្រធាននាយកដ្ឋាន និងអមដំណើរដោយប្រធាន/អនុប្រធានការិយាល័យ និងមន្រ្តីបុគ្គលិកជាច្រើននាក់ ដើម្បីចូលរួមគោរពវិញ្ញាណក្ខ័ន្ធលោកជំទាវ សួង សុវណ្ណរាសី អនុប្រធាននាយកដ្ឋានចារកម្ម និងស៊ើបអង្គេត នៃអង្គភាពប្រឆាំងអំពើពុករលួយ ដែលបានទទួលមរណកាលពីថ្ងៃទី១៨ ខែសីហា ឆ្នាំ២០១៥ ដោយរោគាពាធ នៅមន្ទីរពេទ្យប្រទេសថៃ ។ ឯកឧត្តមប្រធាននាយកបានមានប្រសាស៍ថាៈ ក្នុងនាមឯកឧត្តមផ្ទាល់ និងក្នុងនាមនាយកដ្ឋានការពារហេដ្ឋារចនាសម្ព័ន្ធនៃលេខធិការដ្ឋាន គ.ជ.ប.ភ សូមចូលរួមចែករំលែកទុក្ខដ៏ក្រៀមក្រំបំផុតជូនចំពោះ ឯកឧត្តម សម្បត្តិ ហ៊ូណា និងក្រុមគ្រួសារដែលបាត់បង់ភរិយាជាទីស្រលាញ់ និងសមាជិកដ៏សំខាន់របស់គ្រួសារ ។ ឯកឧត្តមបន្ថែមថា ការបាត់បង់លោកជំទាវ សួង សុវណ្ណរាសី ជាការបាត់បង់នូវធនធានមនុស្សម្នាក់ដែលមានសមត្ថភាព និងចំណេះដឹងរបស់អង្គភាពប្រឆាំងអំពើពុករលួយ និងសង្គមជាតិផងដែរ ។ ក្នុងឱកាសនោះដែរ នាយកដ្ឋានបាននាំមកនូវបាច់ផ្ការំលែកទុក្ខ(ក្រោន) និងបច្ច័យសរុបចំនួន៥៥០ដុល្លា ដែលជាថវិកាផ្ទាល់ខ្លួនរបស់ ឯកឧត្តមប្រធាននាយកដ្ឋាន ចំនួន៥០០ដុល្លា និង លោក ពៅ វិទូ ចំនួន៥០ដុល្លា ជូនចំពោះគ្រួសារសពផងដែរ ។ ក្នុងទឹកមុខក្រៀមក្រំស្រណោះសោកស្តាយភរិយាជាទីស្រលាញ់ ឯកឧត្តម សម្បត្តិ ហ៊ូណា និងក្រុមគ្រួសារ បានថ្លែងអំណរគុណដល់ឯកឧត្តមប្រធាននាយកដ្ឋាន និងក្រុមការងារទាំងអស់ដែលបានគោរពស្រលាញ់រាប់អានចូលរួមក្នុងកម្មពិធីបុណ្យថ្ងៃនេះ សូមប្រកបតែពុទ្ធពរទាំង៤ប្រការ គឺអាយុ វណ្ណៈ សុខៈ ពលៈ និងសម្រេចបានជោគជ័យគ្រប់ភារកិច្ចការងារផងដែរ ។
